Ladaki Bahin Yojana e-KYC updates: मुख्यमंत्री माझी लाडकी बहीण योजनेचा लाभ कायमस्वरूपी मिळवण्यासाठी सर्व पात्र महिलांना त्यांची e-KYC (इलेक्ट्रॉनिक नो युवर कस्टमर) प्रक्रिया पूर्ण करणे बंधनकारक करण्यात आले आहे. जर ही प्रक्रिया पूर्ण केली नाही, तर योजनेअंतर्गत मिळणारी आर्थिक मदत थांबवली जाऊ शकते.
e-KYC करण्याची अंतिम मुदतशासनाच्या नवीन परिपत्रकानुसार, ‘मुख्यमंत्री माझी लाडकी बहीण’ योजनेच्या सर्व पात्र महिलांना e-KYC प्रक्रिया पूर्ण करण्यासाठी दोन महिन्यांची मुदत देण्यात आली आहे. ही प्रक्रिया १८ सप्टेंबर २०२५ पासून सुरू झाली असून, ती १८ नोव्हेंबर २०२५ पूर्वी पूर्ण करणे आवश्यक आहे.
e-KYC प्रक्रिया कशी पूर्ण करावी?
लाभार्थी महिला घरबसल्या ऑनलाइन पद्धतीने किंवा जवळच्या सरकारी सेवा केंद्रात जाऊन e-KYC प्रक्रिया पूर्ण करू शकतात.
ऑनलाइन प्रक्रिया
- सर्वप्रथम ‘मुख्यमंत्री माझी लाडकी बहीण’ योजनेच्या अधिकृत वेबसाइटवर (ladakibahin.maharashtra.gov.in) जा.
- वेबसाइटच्या होम पेजवर e-KYC साठी असलेल्या लिंकवर क्लिक करा.
- तुमच्या आधार कार्डशी जोडलेल्या मोबाईल क्रमांकावर एक OTP (वन टाइम पासवर्ड) येईल. तो OTP टाकून तुमची माहिती प्रमाणित (Verify) करा.
- त्यानंतर पती किंवा वडिलांचा आधार क्रमांक आणि आवश्यक माहिती भरा. त्यांच्या आधारशी जोडलेल्या मोबाईलवर आलेला OTP टाकून माहिती प्रमाणित करा.
- आवश्यक माहिती आणि स्वयं-घोषणापत्र (Declaration) सादर करून प्रक्रिया पूर्ण करा.
आवश्यक कागदपत्रे
- लाभार्थी महिलेचे आधार कार्ड
- आधार कार्डशी जोडलेला मोबाईल क्रमांक
- पती किंवा वडिलांचे आधार कार्ड आणि त्यांच्याशी जोडलेला मोबाईल क्रमांक
दरवर्षी होणार e-KYC
यापुढे दरवर्षी जून महिन्यापासून योजनेच्या लाभार्थ्यांना e-KYC करणे बंधनकारक असेल. त्यामुळे सर्व लाभार्थ्यांनी याची नोंद घ्यावी आणि वेळेवर आपली e-KYC प्रक्रिया पूर्ण करावी, असे आवाहन शासनाकडून करण्यात आले आहे.
ऑगस्ट महिन्याचा हप्ता लवकरच जमा होणारः
गेल्या काही दिवसांपासून ऑगस्ट महिन्याचा हप्ता सप्टेंबरच्या पहिल्या आठवड्यात जमा होईल, अशी शक्यता वर्तवली जात होती. मात्र, पहिला आठवडा उलटला तरी महिलांच्या खात्यात पैसे आले नाहीत. यावर, महिला आणि बालविकास मंत्री आदिती तटकरे यांनी स्पष्ट केले आहे की, ऑगस्ट महिन्याचा हप्ता लवकरच लाडक्या बहिणींच्या खात्यात जमा होईल.
अदिती तटकरे यांनी हे देखील सांगितले की, सरकारचा लाडकी बहीण योजना यशस्वीरित्या सुरू ठेवण्याचा संकल्प आहे आणि या योजनेचा लाभ अशाचप्रकारे नियमितपणे मिळत राहील. त्यामुळे, ऑगस्ट महिन्याचे ₹१५०० लवकरच महिलांच्या खात्यावर जमा होण्याची शक्यता आहे.
ऑगस्ट आणि सप्टेंबरचे ₹३००० एकत्र मिळणार का?
महिलांकडून ऑगस्ट आणि सप्टेंबरचे हप्ते म्हणजेच ₹३००० एकत्र मिळणार का, असा प्रश्न उपस्थित केला जात आहे. मात्र, याबाबत अद्याप कोणतीही अधिकृत घोषणा करण्यात आलेली नाही. सरकारकडून याबद्दल स्पष्टीकरण येणे बाकी आहे.
लाडक्या बहिणींना २१०० रुपये कधी मिळणार?
योजनेत ₹२१०० देण्याबद्दलच्या आश्वासनाबाबत विचारले असता, आदिती तटकरे यांनी सांगितले की, जाहीरनामा हा पाच वर्षांसाठी असतो आणि त्यात दिलेले ₹२१०० चे आश्वासन सरकार नक्कीच पूर्ण करेल. परंतु, सध्या लाभार्थ्यांपर्यंत या योजनेचा लाभ नियमितपणे पोहोचवणे याला सरकारचे प्राधान्य आहे. योग्य वेळी ₹२१०० चा लाभ लाडक्या बहिणींना पोहोचेल, असे त्यांनी नमूद केले.
या माहितीमुळे पुणे आणि महाराष्ट्रातील इतर भागांतील लाडक्या बहिणींना मोठा दिलासा मिळाला आहे, कारण त्यांना लवकरच ऑगस्ट महिन्याचा हप्ता मिळण्याची शक्यता आहे..
